Jerusalema heahti ja bestojupmi
Vuoi du, hearjideaddji,
gii ieš it leat hearjiduvvon!
Vuoi du, beahtti,
gii ieš it leat behttojuvvon!
Go don leat geargan hearjideames,
de don ieš hearjiduvvot,
go don leat heaitán beahttimis,
de don ieš behttojuvvot.
Hearrá, árpmit min,
dutnje mii dorvvastit.
Leage min givrodat juohke iđit,
min bestojupmi heađi bottus!
Álbmogat báhtarit garra jumas,
du allatvuođa ovddas
dat buot bieđganit.
Rievideaddjit ferejit
nugo rásselohkut,
dego rásselohkkomoahti
sii fallehit buot.
Aliduvvon lea Hearrá
guhte ássá allagasas,
son deavdá Siona rivttiin
ja vuoigatlašvuođain.
Boahtá oadjebasvuohta.
Viisodat ja máhttu lea dávvir
mii addá bestojumi.
Hearrá ballu lea Siona riggodat.
Gullet! Ariela gáhtain olbmot luibmet,
ráfiáirasat čirrot bahččagit.
Geainnut leat ávdimat,
daid ii jođe šat oktage.
Soahpamušat leat rihkkojuvvon,
duođašteddjiin ii jerrojuvvo,
olmmoš ii adnojuvvo maninge.
Eanan morašta ja goarrána,
Libanon njáigu ja stohkku.
Saron lea šaddan ávdin eanamin,
Bašan ja Karmel leat bálljásat.
Dál mun loaiddastan ovdan
allatvuođastan, cealká Hearrá,
dál mun almmustuvan fámustan.
Dii sahkanahttibehtet suoinni,
dii riegádahttibehtet oalggaid,
mu vuoiŋŋanas loaktá din dego dolla.
Álbmogat boldojuvvojit kálkan,
dat boldojuvvojit
dego čuhppojuvvon bastilislánját.
Gullet, gáiddus álbmogat,
maid mun lean dahkan!
Dii geat eallibehtet lahkosiin,
ohppet dovdat mu fámu!
Suttolaččat doarggistit Sionis,
ipmilmeahttumat dohppehallet ballui:
“Gii sáhttá ássat
duššadeaddji dola guoras,
gii sáhttá orrut
agálaš dollanjuorššuid gáttis?”
Dat gii eallá vuoigatlaččat
ja sárdnu duođa,
gii hilgu dan mii vuitojuvvo veahkaválddiin,
gii biehttala váldimis duolgguid,
gii ii dáhto guldalit varradahkuságaid,
iige geahča bahá guvlui.
Son beassá ássat alla báikkiide,
ceakkovárri lea su báhtaransadji,
sus lea doarvái láibi
iige sus váillo čáhci.
Iežat čalmmiiguin don beasat
oaidnit gonagasa buot su hearvásvuođas,
don beasat oaidnit viiddis eatnama.
Dalle don muittát hirpma áiggi:
Gos dál lea vearrogeassi,
gos vearu vihkkejeaddji,
gos toartnaid dárkkisteaddji?
Don it oainne šat goavis álbmoga,
álbmoga mii hálai amas láhkái,
giela maid olmmoš ii ádde.
Geahča Sionii,
min ávvudemiid gávpogii!
Don beasat oaidnit Jerusalema,
oadjebas vuoiŋŋadanbáikki,
goađi mii ii gaikojuvvo, ii sirdojuvvo.
Dan čuolddat eai goassege luovvan,
dan báttiin ii oktage boatkan.
Doppe mis lea
veagalaš Ipmil, Hearrá,
doppe golggiidit jogat
ja stuorra eanut.
Daid ii jođe oktage fanas,
ii rasttil oktage gorges soahteskiipa.
Hearrá lea min duopmár,
Hearrá lea min oaivámuš,
Hearrá lea min gonagas,
son lea min beasti.
Go toavat leat loažžan
eaige šat doala stivlli sajis,
eai borjasiid čavga,
de dalle ollu soahtesálaš juogaduvvo,
velá lápmásatge servet stajádussii.
Ii oktage gávpotolmmoš daja:
“Mun lean buozas”,
dasgo dat álbmot mii ássá doppe,
lea ožžon suttuid ándagassii.
