Vare don gaikkodivččet almmi
ja njiejašit vuolás,
nu ahte várit doarggistivčče
du muođuid ovddas!
Vare don šloavggehivččet
dego dolla rođus,
dego dolla mii duldeha čázi!
Du vašálaččat oahpašedje
dovdat du nama
ja álbmogat doarggistivčče
du muođuid ovddas,
go don dagašit oavdduid
maid mii eat lean vuordán
eatge gullan.
Ii goassege ovttage beallji leat gullan
iige ovttage čalbmi oaidnán
ahte livččii eará ipmil go don,
ipmil guhte veahkeha
daid geat vurdet su.
Don boađát daid ovddal
geat dahket iluin dan mii lea riekta,
daid ovddal geat muitet du
ja vádjolit du geainnuid.
Don moaráhuvvet,
go mii leat suddudan doloža rájes.
Dattetge mii bestojuvvuimet.
Mii leat buohkat šaddan
dego buhtismeahttun diŋgan,
min vanhurskkisvuohta
lea nugo duolvaduvvon bivttas.
Mii leat buohkat dego goldnan lasttat,
ja biekka láhkái min suttut
dolvot min eret.
Ii oktage čuorvvo du nama,
ii oktage gohccá iige dorvvas dutnje.
Don leat čiehkan mis muođuidat
ja guođđán min suttuideamet váldái.
Muhto don, Hearrá, leat min áhčči.
Mii leat láiri ja don leat hábmen min,
mii leat buohkat du gieđaid dahku.
Hearrá, ale suhta midjiide nu sakka,
ale muitte min bahás daguid agálaččat.
Geahča midjiide,
mii leat buohkat du álbmot.
Du bassi gávpogat leat šaddan rohtun,
Sion lea dego meahcci,
Jerusalem ávdin báiki.
Min bassi ja hearvás tempel
gos min áhčit máidno du,
lea boldojuvvon dolain,
dat mii lei midjiide ráhkkáseamos,
lea šaddan čievračopman.
Sáhtátgo don, Hearrá, dattetge
leat dagakeahttá maidege,
áiggutgo orrut jávohaga
ja vuolidit min nu sakka?
