Sálbma 103
Davida sálbma.
Máinno Hearrá, mu siellu,
buot mii mu siste lea,
máinno su bassi nama!
Máinno Hearrá, mu siellu,
ale vajáldahte buot buriid
maid son dahká.
Son addá ándagassii buot mu suttuid
ja dálkkasta buot mu buozalvasaid.
Son lonista mu heakka hávddis
ja kruvnnida mu árpmuin
ja váibmoláđisvuođain.
Son galleha mu eallima buriiguin,
ja mun šattan fas nuorran dego goaskin.
Hearrá dagut leat vanhurskásat,
son buktá vuoigatvuođa
buot sordojuvvon olbmuide.
Son čájehii geainnuidis Mosesii,
Israela álbmogii stuorra daguidis.
Váibmoláđis ja árbmugas lea Hearrá.
Son lea gierdavaš ja su árbmu lea stuoris.
Ii son sivahala min agibeaivvi,
ii son leat moaris agálaččat.
Ii son daga midjiide dan maid mii ánssášit,
ii mávssat midjiide min vearredaguid.
Nu allat go albmi lea eatnama badjel,
nu stuoris lea Hearrá árbmu daidda
geat ballet sus.
Nu guhkkin go nuorti lea eret oarjjis,
nu guhkás son gáidada mis min suttuid.
Nugo áhčči árkkálmastá mánáidis,
nu árkkálmastá Hearrá daid geat ballet sus.
Son diehtá mo mii leat sivdniduvvon,
son muitá ahte mii leat muolda.
Olbmo beaivvit leat nugo rásit:
Nugo gietti rássi son liđiida,
ja go biegga manná su badjel,
de son ii leat šat eambbo
iige su báiki šat dovdda su.
Muhto Hearrá árbmu
lea agálašvuođas agálašvuhtii
daid oassi geat ballet sus.
Su vanhurskkisvuohta ollá buolvvas bulvii
daidda geat dollet su lihtu,
muitet su báhkkomiid
ja ellet daid mielde.
Hearrá lea ceggen truvnnus albmái,
buot lea biddjojuvvon su válddi vuollái.
Máidnot Hearrá, buot su eŋgelat,
dii gievrras sáŋgárat
geat dahkabehtet maid son gohčču
ja jeagadehpet su jiena.
Máidnot Hearrá, buot su veagat
geat bálvalehpet su
ja ollašuhttibehtet su dáhtu.
Máidnot Hearrá, buot su sivdnádusat
buot báikkiin gos son ráđđe.
Máinno Hearrá, mu siellu!
