Sálmmaid girji 87

Hearrá lea vuođđudan iežas gávpoga

bassi váriide.

Siona poarttaid son ráhkista

eambbo go Jakoba eará gođiid.

Hearvás ságat leat celkojuvvon

du birra, Ipmila gávpot. Sela

Dain geat dovdet mu,

mun namahan Rahaba ja Babylona,

Filistea, Tyrosa ja Nubia.

Dáppe leat buohkat riegádan.

Sionii celkojuvvo:

“Dáppe leat buohkat riegádan.”

Alimus lea ieš vuođđudan dán gávpoga.

Hearrá čállá álbmogiid girjái:

“Dáppe leat buohkat riegádan.” Sela

Ja olbmot dánsot ja lávlot:

“Du siste leat buot mu ádjagat!”