Amos 5

₂Nieida Israel lea gahččan,

ii son čuožžil šat eambbo.

Son veallá hilggohassan iežas eatnamis,

ii oktage čuoččáldahte su.

₃Ná cealká Hearrá Ipmil Israela álbmogii:

Jos gávpogis vulget soahtái duhát olbmá,

de čuođis báhcet,

ja jos čuođis vulget,

de logis báhcet.

₄Ná cealká Hearrá Israela álbmogii:

Ohcet mu, de dii oažžubehtet eallit!

₅Allet vuolgge Betelii,

allet mana Gilgalii,

allet vádjol Beer Šebai!

Gilgalhan dolvojuvvo fáŋgavuhtii,

ja duššin šaddá Betel.

₆Ohcet Hearrá, de oažžubehtet eallit!

Muđui son falleha dollan

Josefa eatnama ja duššada dan,

ja Betel buollá, iige leat čáskadeaddji.

₇Dii dahkabehtet rievtti máronin

ja suhppebehtet vuoigatvuođa eatnamii.

₈Son lea dahkan

Nieidagihpu ja Čuoiggaheddjiid.

Son nuppástuhttá seavdnjada iđidin

ja sevnnjodahttá beaivvi idjan.

Son rávká ábi čázi

ja golggaha dan eatnamii.

Hearrá lea su namma.

₉Son diktá heavahusa

álddagastit ladni badjelii,

ja nana ladnige cuovkana.

₁₀Dii vašuhehpet dan gii

doarju rievtti dikkis,

ja fasttášehpet dan gii sárdnu duođa.

₁₁Dii duolbmabehtet váivvášiid

ja gáibidehpet sis gortni divadin.

Dan dihte didjiide geavvá ná:

Vaikko dii huksebehtet

viesuid čullojuvvon geađggis,

de dii ehpet oaččo ássat dain.

Vaikko dii gilvibehtet

hearvás viidnegárddiid,

de dii ehpet oaččo juhkat daid viinni.

₁₂Mun dovddan din ollu rihkkumiid

ja din eatnat suttuid.

Dii doarrádallabehtet vigihis olbmuid,

váldibehtet duolgguid

ja ádjibehtet gefiid dikkis.

₁₃Dan dihte jierpmálaš

orru jávohaga dán áiggi,

dainna go dat lea bahás áigi.

₁₄Ohcet buori alletge bahá,

de dii oažžubehtet eallit!

Dalle Hearrá, Almmiveagaid Ipmil,

lea dinguin, nugo dii dadjabehtet.

₁₅Vašuhehket bahá ja ráhkistehket buori,

diktet rievtti ráđđet gávpotpoarttas!

Dalle Hearrá, Almmiveagaid Ipmil,

lea árbmugas Josefa bázahassii.

₁₆Danne cealká Hearrá,

Almmiveagaid Ipmil, Hearrá:

Buot šiljuin gullojit váidalusat,

buot geainnuin olbmot čurvot:

“Vuoi, vuoi!”

Sii bovdejit morašdoaluide bealdobargiid,

rávket váidalusaide dakkáriid

geat máhttet lávlut morašlávlaga.

₁₇Buot viidnegárddiin

gullo vuobaideapmi,

go mun manan ovdan din gaskkas,

cealká Hearrá.

₁₈Vuoi din geat áibbašehpet

Hearrá beaivvi!

Manin ávkin Hearrá beaivi lea didjiide?

Dat buktá seavdnjadasa, ii čuovgga –

₁₉dego dalle go olmmái

báhtara ledjonis,

muhto su ovddal boahtá guovža,

ja go son boahtá ruoktot ja dorje seaidnái,

de son gáskkáhallá gearbmašii.

₂₀Almma Hearrá beaivi lea seavdnjat

iige čuovgat,

moskuvuohta mas ii leat ii suotnjarašge?

₂₁Mun vašuhan din ávvudemiid,

mun fasttášan daid,

din ávvučoakkalmasaid mun in gierdda.

₂₂Go dii oaffaruššabehtet munnje

boaldinoaffariid ja borramušoaffariid,

de mun in váldde daid vuostá,

din buoiddes gálbbebiergooaffariidda

mun in geahča.

₂₃Gáidat mus lávlagiiddát šláma!

Mun in dáhto gullat du hárppaid čuojaheami.

₂₄Muhto golggiidehkos vuoigatvuohta

dego čáhci,

vanhurskkisvuohta dego

álelassii golgi jogaš.

₂₅Buvttiidetgo dii munnje

njuovvanoaffariid ja borramušoaffariid

meahcis dan njealljelogi jagi,

Israela álbmot?

₂₆Ehpet, muhto dii guttiidet

ipmilgovaideattet,

Sakkuta, din gonagasa,

ja Kevana, din ipmilnástti,

maid leiddet dahkan alcceseattet.

₂₇Mun doalvvun din fáŋgavuhtii

dobbelii Damaskusa, cealká Hearrá.

Almmiveagaid Ipmil lea su namma.