Sátneláskkut 6

₁Bártnážan,

jos don leat addán dáhkádusa

lagamuččat ovddas,

addalan gieđaid vierroolbmuin,

₂de du sánit leat čatnan du,

dat maid leat cealkán, lea darvehan du.

₃Daga dasto ná, bártnážan,

vai gájut iežat,

go juo leat šaddan lagamuččat gihtii:

Mana hoahpus ja doarjal lagamuččat,

₄ale udno čalmmiidasat nahkáriid

alege oađđinmášu

čalbmerapmasiiddásat.

₅Gájo iežat dego gasella bivdis,

nugo loddi loddejeaddji gieđas.

₆Mana, láikkan, gotkka lusa,

geahča mo dat bargá ja šatta viissisin!

₇Das ii leat oaivámuš,

fáldi iige ráđđejeaddji,

₈muhto almmatge

dat háhká borramuša geasset

ja čohkke biepmu láddjenáigge.

₉Man guhká don veallát, láikkan,

goas don morihat ja lihkat?

₁₀Nohkas vel veahá,

ajihustte vel uhccánaš,

vuoiŋŋas ain bottoža ruossalas gieđaid,

₁₁de geafivuohta falleha du

dego rievvár,

vádjitvuohta vearjoolbmá láhkái.

₁₂Návccahis olmmoš, suohpáhis olmmái

sárdnu suorrenjuokčamiin,

₁₃časkkaša čalmmiid, rábasta julggiin

ja addá mearkkaid suorpmaiguin.

₁₄Behtolaš váimmuin

son hutká bahás juonaid,

dagaha álo riidduid.

₁₅Dan dihte su deaivida

fáhkkestaga lihkuhisvuohta,

čalbmeravkalanbottus

son doddjojuvvo cuovkkas,

iige leat dálkkas.

₁₆Guhtta ášši Hearrá vašuha,

čieža son fasttáša:

₁₇gorges čalmmit, behtolaš njuovčča,

gieđat mat golggahit vigihis vara,

₁₈váibmu mii hutká bahás ráđiid,

juolggit mat viegahit bahá,

₁₉vearreduođašteaddji gii gielástallá

ja dat gii dagaha riidduid

vieljažiid gaskii.

₂₀Bártnážan, doala áhčát báhkkomiid,

ale hilggo eatnát oahpahusa.

₂₁Ane daid álelassii váimmu vuostá,

čuolbmat daid čeabeha birra.

₂₂Dat láidejit du go don vádjolat,

várjalit du go don veallát,

ja go don gohccát, de dat sárdnot dutnje.

₂₃Báhkkon lea lámpá,

oahpahus lea čuovga,

cuiggodeaddji bagadus

lea eallima geaidnu.

₂₄Dat várjalit du du lagamučča áhkás,

vierronissona livttis njuokčamis.

₂₅Ale anistuva su čábbodahkii,

ale divtte su geasuhit iežat

geahčastagaidisguin.

₂₆Fuorrá sáhttá doalvut dus

vel maŋimuš láibevajahasage,

muhto náitalan nisson

lea bivdimin du heakka.

₂₇Gii sáhttá čohkket hilaid askásis

buollátkeahttá biktasiiddis?

₂₈Sáhttágo oktage vázzit hilaid alde

almmá boalddekeahttá julggiidis?

₂₉Nu geavvá maiddái dasa

gii veallá lagamuččas áhkáin:

Ii oktage gii duohtada su,

beasa ráŋggáškeahttá.

₃₀Ii oktage badjelgeahča suollaga,

go son suoláda go lea nelgon,

₃₁jos son gávnnahallá,

de son ferte máksit čiežageardásaččat

ja addit buot mii sus lea.

₃₂Jierpmeheapme lea dat

guhte furroša,

son duššada iežas.

₃₃Son oažžu das aivve

heahpada ja vahága,

iige su heahpat sihkkojuvvo goassege.

₃₄Dasgo boatnji balahahkesvuohta

lea garas,

máksobeaivvi son ii árpmit.

₃₅Soabahusruđain son ii beroš,

ii son mieđit, vaikko velá dáhtošit

addit sutnje ollu attáldagaid.