Goaskimat, seder ja viidnemuorra
Munnje bođii dát Hearrá sátni: Olmmoš, divo ovdan árvádusa Israela álbmogii, muital dasa veardádusa. Daja: Ná cealká Hearrá Ipmil:
Stuorra goaskin mas ledje stuorra soaját,
guhkes dolggit
ja suhkkes ja girjját dolgefárda,
bođii Libanonii.
Dat válddii sederis gierraga,
dojii das bajimus oavssi
ja doalvvui dan gávpeolbmáid eatnamii,
bijai dan gávppašeddjiid gávpogii.
Dasto dat válddii dan eatnamis vesá
ja ceggii dan šattolaš eatnamii
golgi čázi gáddái,
báikái mas sieđganai livččii šaddan,
vai dat ruohtastuvašii ja stuorošii
vuollegisšattot viidnemuorran
man suorggit sojašedje goaskima guvlui
ja man ruohttasat šattašedje dan suojis.
Nu dat šattai viidnemuorran,
dagai surggiid
ja bohciidahtii lastás ovssiid.
Muhto de bođii nubbi stuorra goaskin,
stuorrasoajat ja suhkkesdolggat;
dan beallái viidnemuorra fatnalahtii
ruohttasiiddis
ja geaigguhii surggiidis dan guvlui,
vai oččošii das čázi
eambbo go iežas eatnamis.
Dattetge dat lei ceggejuvvon
buori eatnamii, golgi čázi gáddái,
vai dat dagašii surggiid,
šaddadivččii šaddosiid
ja šattašii hearvás viidnemuorran.
Daja: Ná cealká Hearrá Ipmil:
Ceavzágo dat?
Almma dan ruohttasat gaikojuvvojit
ja dan šaddosat čuhppojuvvojit?
Almma dan ruonas lasttat goldnet?
Ii adnojuvvo ollu vuoibmi
iige stuorra soahteveahka
gaikkihit dan bajás ruohttasiin.
Dat lea ceggejuvvon,
muhto ceavzágo dat?
Almma dat goiká
go nuortabiegga guoská dasa,
almma dat goldná dan eatnamis
mas dat bohciidii?
Munnje bođii dát Hearrá sátni: Daja dán gážžáris álbmogii: Ehpetgo dii ipmir maid dát mearkkaša? Daja: Babylonia gonagas bođii Jerusalemii, válddii dan gonagasa ja oaivámuččaid ja doalvvui sin Babylonii. De son válljii olbmá gonagassogas, dagai suinna lihtu ja bijai su vuordnut váli. Eatnama njunnošiid son doalvvui mielddis. Nu šattai vai riika livččii vuollegaš iige badjánivčče, ja dat bisošii go doallá lihtu suinna. Muhto dat olmmái stuibmidišgođii su vuostá ja vuolggahii áirasiid Egyptii, vai sutnje addojuvvošedje heasttat ja stuorra soahteveahka. Ceavzágo son? Beasságo báhtui dat gii barggai ná? Oažžugo son rihkkut lihtu ráŋggáškeahttá? Nu duohta go mun ealán, cealká Hearrá Ipmil, son jápmá Babylonii, dan gonagasa lusa gii dagai su gonagassan, danin go son badjelgeahčai váli maid lei vurdnon, ja rihkui lihtu maid gonagas lei dahkan suinna. Go ráhkaduvvojit birastahttinčomat, huksejuvvojit fallehangorgŋehagat ja ollu olbmot goddojuvvojit, de farao stuorra soahteveagainis ja ollu joavkkuidisguin ii veahket su soađis. Ráđđejeaddji badjelgeahčai váli maid lei vurdnon, ja rihkui lihtu. Vaikko son lei nannen lihtu, de son goit dagai buot dan. Son ii beasa báhtui.
Dan dihte cealká Hearrá Ipmil: Nu duohta go mun ealán, mun mávssahan sutnje dan ahte son badjelgeahčai dan váli maid lei vurdnon mu nammii, ja rihkui lihtu. Mun lebben fierbmán su ala, ja son darvána mu bivdosii. De mun doalvvun su Babylonii, ja doppe mun bijan su vástidit das ahte son lei behtolaš munnje. Su soahteveaga buoremus soahteolbmát gahččet miehkkái, ja dat geat báhcet, biđgejuvvojit buot biekkaide. Dalle dii ipmirdehpet ahte mun, Hearrá, lean sárdnon.
Ná cealká Hearrá Ipmil: Mun doaján oavssi guhkes sedera gierragis, válddán njuoras oavssáža bajimus gierragis ja ceggen dan alla ja stuorra várrái. Israela alla várrái mun ceggen dan. Dat bohciidahttá surggiid, šaddada šaddosiid ja šaddá hearvás sederin. Buotlágáš lottit bessejit dan suojis, soajálaččaid eatnatvuohta ássá dan ovssiid suoivanis. Dalle buot meahci muorat ipmirdit ahte mun, Hearrá, dagan alla muora vuollegažžan ja vuollegis muora allagin. Mun ástadan ruonas muora ja dagan ástan muora ruonasin. Mun, Hearrá, lean sárdnon, ja mun dagan dan.
