Hearrá lohpádus Israelii
Gullet mu,
dii geat váinnuhehpet vanhurskkisvuođa
ja ohcabehtet Hearrá!
Gehččet báktái mas lehpet loggojuvvon,
geađgeroggái man čiekŋalasas
lehpet roggojuvvon.
Gehččet Abrahamii, áhččáseattet,
ja Sarai gii din riegádahtii!
Abraham lei dušše okta
go mun rávken su,
muhto mun buressivdnidin su
ja dahken su eatnagin.
Hearrá jeđđe Siona
ja árpmiha dan viessobázahasaid.
Son dahká dan meahci Edena láhkásažžan,
dan ávdin eatnamiid
dego Hearrá gilvvagárdin.
Doppe lea ávvu ja illu,
doppe gullojit máidnunlávlaga šuoŋat.
Guldal mu, mu álbmot,
gullet dárkilit, olbmuid čearddat!
Mus vuolgá láhka,
mu vuoigatvuohta
šaddá álbmogiid čuovgan.
Mu vanhurskkisvuohta lahkana,
mu bestojupmi bohciida,
fámolaš gieđain mun dubmen álbmogiid.
Gáiddus eatnamat vurdet mu,
dat bidjet doaivvuset mu fápmui.
Bajidehket geahčastaga almmi guvlui,
geahčadehket eatnama vuollin!
Albmi bossojuvvo eret dego suovva,
eanan oapmu dego bivttas,
dan ássit jápmet dego čurohat.
Muhto mu bestojupmi bistá agálaš áigái,
mu vanhurskkisvuohta ii dušša goassege.
Gullet mu, dii geat dovdabehtet
vanhurskkisvuođa,
dii geain lea váimmus mu láhka:
Allet bala olbmuid hiddjádusain,
allet suorgan sin bilkosániin!
Sidjiide geavvá dego biktasii
maid giksa borrá,
nugo ullodiŋgii maid muohcu loaktá.
Muhto mu vanhurskkisvuohta
bistá agálaš áigái,
mu bestojupmi buolvvas bulvii.
Ipmil veahkeha Siona nugo dolin
Gohccá, gohccá,
gárvot gievravuođa ja fámu, Hearrá!
Gohccá nugo dološ beivviid,
nugo dološ buolvvaid áigge!
Donhan časket jámas Rahaba,
rehttejit čieŋalvuođa guovddi.
Don goikadit ábi,
čiekŋalis meara čáziid,
don dahket mearabotni geaidnun
lonistuvvon olbmuid mannat rastá.
Dat geaid Hearrá lea lonistan,
máhccet,
sii bohtet Sionii ávvudemiin,
agálaš illu oaivvi badjel.
Ávvu ja illu jokset sin,
moraš ja šuohkkin báhtarit.
Mun, mun lean din jeđđejeaddji.
Manin don balat jámolaš olbmuin,
olbmománáin geat goldnet dego rássi?
Don leat vajáldahttán Hearrá,
du sivdnideaddji,
gii lebbii almmi
ja bijai eatnama vuođđudusaid.
Álohii, geažos beaivvi
don soiget soardi moari,
go son iskkai duššadit du.
Gos dál lea soardi moarri?
Fargga beassá luovos láhkkiin
dat gii lea šaddan fáŋgan,
ii son biddjojuvvo hávdái,
ii sus váillo šat láibi.
Mun lean Hearrá, du Ipmil,
mun stuimmáskahtten meara
nu ahte bárut máraidedje,
mu namma lea Hearrá, Almmiveagaid Ipmil.
Mun lean bidjan sániidan du njálbmái
ja gokčan du gieđaidan suodjái.
Mun gii lebbejin almmi
ja bidjen eatnama vuođđudusa,
mun cealkkán Sionii: “Don leat mu álbmot.”
Israel vealtá Hearrá moari gearas
Gohccá, gohccá!
Čuožžil, Jerusalem!
Don leat juhkan Hearrá gieđas
su moari geara,
gurren gitta botni rádjái
lihti mii bijai du suoibut.
Ii oktage bártniin
maid don leat riegádahttán,
leat dáhtton láidet du,
ii oktage buot mánáin
geaid don leat biebman,
leat váldán du gihtii.
Lihkuhisvuođat deaividedje
du guovttegeardásaččat
– giiba du árkkášivččii! –
stajádus ja billisteapmi,
nealgi ja miehkki
– giiba du jeđđešii!
Du bártnit veallájit
vuoimmeheapmin gáhtačiegain
dego antilohpat fierpmis,
sii leat deaivvahallan
Hearrá buolli moarrái,
du Ipmila suhttui.
Danne gula dal dán, duotna,
don gii leat gárihuvvan, muhto it viinnis.
Ná cealká du hearrá,
Hearrá, du Ipmil,
son gii čuoččuha iežas álbmoga ášši:
Mun válddán du gieđas lihti
mii bijai du suoibut,
it goassege šat dárbbaš juhkat
mu buolli moari gearas.
Mun bijan dan du givssideddjiid gihtii,
daid geat gohččo du:
“Veallán eatnamii,
vai mii beassat vázzit du badjel!”
Don šaddet addit sealggát dulbmojuvvot,
jalges eanamin, olbmuid johtolahkan.
