Halleluja!
Ávdugas dat gii ballá Hearrás
ja gávdná ilu su báhkkomiin.
Su nálli šaddá fámolažžan eatnamis,
vuoigatlaš olbmuid sohka
buressivdniduvvo.
Su viesus lea vallji ja riggodat,
su vanhurskkisvuohta
bissu nanusin agálaččat.
Seavdnjadasas ihtá čuovga
vuoigatlaččaide.
Vanhurskkis lea váibmoláđis ja árbmugas,
bures geavvá dan olbmui
gii millosit addá loanas,
gii lea vuoiggalaš buot das maid dahká.
Son ii guossal goassege,
vuoiggalaš olbmo muitu bissu agálaččat.
Ii son bala bahás ságain,
su váibmu lea nanus,
son dorvvasta Hearrái.
Son lea oadjebas iige bala,
son beassá oaidnit
mo su vašálaččat gahččet.
Son gilvá váivvášiidda attáldagaid,
su vanhurskkisvuohta bissu nanusin,
son aliduvvo ja oažžu gudni.
Ipmilmeahttun oaidná dan ja suhttá,
son gáská bániid, son hahpá.
Ipmilmeahttumiid hálidus duššá.
Your browser does not support HTML5 audio.
